Wednesday, May 29, 2019

119. හෙටට පිංබර දිවිය ජයගමු සොඳුරියේ අපි එක්වෙලා.........

සඳක් සිසිලෙන් නැහැවෙනා මේ සොඳුරු මොහොතක හිනැහිලා
සිතක් දෙසිතක් සසර අතරේ නොසිතු සේ අද ලංවෙලා
විලක් විලසට සින්න කරගත් ආදරේ තව හැඩවෙලා
වෙසක් මාසෙක බැඳුනු අතැඟිලි අපේ සෙනෙහස වැඩිකලා

රතට රතු මල් පාවඩක් වී මැයි කුසුම් බිම වැතිරිලා
අපට ආසිරි පුදකරයි දැන් සිනා සුසුමන් පතුරලා
හිතට සැනසුම සදන සිනහව නිතර මුවගේ රඳවලා
හෙටට පිංබර දිවිය ජයගමු සොඳුරියේ අපි එක්වෙලා.........

Monday, May 6, 2019

118. ලබන භවයක ලඟින් ඉමු අපි සුවඳ ගෙන රොබරෝසියා ............

ආත් මෙක බැඳි පුරුදු සෙනෙහස භවෙන් භව මතකේ තියා
කාත් කවුරුත් නොමැති සිත මත සතුට තවරන්නට කියා
පාත් වුණු සුදු මීදුමේ තෙත රැගෙන සීතල ඇති නියා
මාත් නුඹ හා තනි වුනා මේ තුරු වියනෙ රොබරෝසියා

කිරණ නහවන සිසිල දුරලන ළහිරු අප දෙස නෙත් අයා
සරණ විහඟුන් සමග පෙම්ගී ගැයුවෙ තාලෙට ස්වර තියා
පුරණ පෙරුමක බලෙන් දෙසිතක පෙම් හැඟුම් උතුරන නියා
දෙරණ සිපගෙන සුවඳ පතුරා අසිරි දෙයි රොබරෝසියා

දැනෙන හැඟුමක සුවය විඳිනට මේ භවේ පින මදි නියා
දැවෙන සුසුමන් කඳුළු විලසට නෙතග රැඳුනේ බැස නොයා
තැවෙන මේ සිත නිරන්තරයෙම පාව එන්නේ නුඹ සොයා
ලබන භවයක ලඟින් ඉමු අපි සුවඳ ගෙන රොබරෝසියා .........

Saturday, April 27, 2019

117. තාම හිත් තුල කැකෑරී ඇත රක්ත පාටට සිංහ ලේ.....

බලන බලන තැන මල් පිපීලා තිබුණු ලස්සන ඒ ඔපේ
හෙලන හෙලන හැම සුසුම් පොදකම මතක හිරවී ඇත අපේ
උයන උයන බත කරවෙලා තව දුම් දමද්දී ගෙයි ලිපේ
කරන කරන ඒ ම්ලේඡ වැඩ දැක හෙන වදියි හිස මත තොපේ.....

මඩිය තරකර ගැන්ම පමණය වෙනත් දෙයකට සිත් නොයා
කැඩිය හැකි තෘෂ්ණාව පොදි බැඳ උනුන් පොරකයි නැත දයා
අඩිය තබලා පෙරට එන්නට බැරිව ලතැවෙන දුක කියා
කොඩිය තවමත් හඬයි දැක දැක යදම් බැඳ දැමු සිංහයා.....

යාම නොබලා ගමන් ආගිය අපට හුරුවූ මංසලේ
කෝම කියමිද කුරිරු සෙවනැලි සරයි දැන් දැන් හැමවෙලේ
මේම සිටියට බිහිරි අඳ ගොළු ලෙසට අපි හැම නිසසලේ
තාම හිත් තුල කැකෑරී ඇත රක්ත පාටට සිංහ ලේ.....

Sunday, April 7, 2019

116. කිඳුරු දෙසිතක නැගුණු විසිතුරු ආලෙ නිරතුරු නවතලා ........

සොඳුරු හැඟුමක කැකුළු මල් පෙති එකින් එක තව පරවෙලා
අඳුරු වී යන සෙනෙහෙ වීදියෙ කඳුළු නංවයි දුක්වෙලා
කිඳුරු දෙසිතක නැගුණු විසිතුරු ආලෙ නිරතුරු නවතලා
රුදුරු වී ඇති අපේ ඉරණම අපිව දෙතැනක රඳවලා

පිරුණු සඳවත දවසෙ මෙහෙයට ගුවන් තලයට ගොඩවෙලා
කෙරුණු ඔච්චම වාවගනු බැහැ හුදෙකලාවම පැතිරිලා
මැරුණු මතකය පණ ලබාගෙන යළි යළිත් සිහි කැඳවලා
තුරුණු හදවත් දවා රිදවයි නහර විනිවිද කළඹලා........

Thursday, March 28, 2019

115. මැදින් මස සුභම සුභ කාරණාවන් පිරෙනවා.........

බිදෙන් බිද වැහි තුහින පොලව සිප ගන්නවා
තුඩින් තුඩ බිගු නදින් මිහිරියාවම මැවෙනවා
දිනෙන් දින හැඩ වෙවී පරිසරය දිලෙනවා
මැදින් මස සුභම සුභ කාරණාවන් පිරෙනවා.........

මැදින් මාසෙ කියන්නේ සුභ කාරණාවන්ගෙන් පිරුණු මාසයක්. ඒ සුභ කාරණාවන්ගෙන් එකක් ඊයෙට යෙදුනා. මීට අවුරුදු තුනකට කලින් ඊයෙ වගේ දවසක තමයි " දුමී" බ්ලොග් ලොවට පිවිසෙන්නේ. සහෝදර බ්ලොග්වරුන්ගේ සහයෝගයත් සමග පැමිණි " දුමී " ට ඊයෙට අවුරුදු තුනක් වෙනවා. සතුට සමගින්ම සහයෝගය දැක්වූ හැමදෙනාටම " දුමී " ගේ ස්තූතිය පුද කර සිටිනවා...

හැමදෙනාටම

ජයවේවා!!!

Friday, March 22, 2019

114. ලගදීම.................

බිදෙන් බිද වැහි තුහින පොලව සිප ගන්නවා
තුඩින් තුඩ බිගු නදින් මිහිරියාවම මැවෙනවා
දිනෙන් දින හැඩ වෙවී පරිසරය දිලෙනවා
මැදින් මස සුභම සුභ කාරණාවන් පිරෙනවා.........

ලගදීම.................

Tuesday, January 8, 2019

(113). නුඹේ දඟ දෙන නෙතඟ බැල්මක වශිය දුටු මුල් දිනමය.....

එබේ තුරු මල් සිනහ රඳවා බලන්නේ නුඹ දෙසමය
ගැබේ ගුවනේ සුවඳ පැතිරී වහින්නේ මල් වැහිමය
නුඹේ දඟ දෙන නෙතඟ බැල්මක වශිය දුටු මුල් දිනමය
ඉබේ සලිතව රඟන මේ හිත දුවන්නේ නුඹ වෙතමය


සීත උතුරන දුරුතු මහ මැද ගුවන දිදුළන නිලමය
ඈත සිට පිණි බිඳිති විසිරී බෙදන්නේ තව පෙමමය
පාත අත්තක ලිහිණි ජෝඩුව බලන්නේ අප දෙසමය
දෝත පැටලී විඳින උණුහුම තව තවත් මට මදිමය


නැගේ සසරක පුරුදු මතකය එදත් නුඹ මා ලඟමය
අගේ කර කර සෙනෙහෙ කොඳුරපු සුවඳ හදවත මතමය
මගේ අහසෙහි දිදුලමින් සිටි චාන්දනියද නුඹමය
නගේ එක්වෙමු එක කැදැල්ලක සොඳුරු දින අද හෙටමය.....

119. හෙටට පිංබර දිවිය ජයගමු සොඳුරියේ අපි එක්වෙලා.........

සඳක් සිසිලෙන් නැහැවෙනා මේ සොඳුරු මොහොතක හිනැහිලා සිතක් දෙසිතක් සසර අතරේ නොසිතු සේ අද ලංවෙලා විලක් විලසට සින්න කරගත් ආදරේ තව හැඩවෙලා වෙසක...